Net ‘n bietjie van my vakansie…

Uiteindelik kan ek weer blog! My seuntjie begin vandag met skool. Het ‘n week terug al dat hy sy klere aanpas en het foto’s geneem, maar ek wil dit net nie aanvaar dat hy al so groot is nie…

En gister het ek weer begin werk. Die ander tikster wat saam met my werk, het my deur die vakansie gesms en meegedeel die baas sê sy moet ander werk soek. Hoop nie hy dink ek gaan alles alleen doen nie.

Die vakansie was lekker. Het net nie by die helfte uitgekom van wat ek alles beplan het nie, maar ek kon darem die pop klaar maak wat my laaitie vir sy sussie wou gee vir Kersfees.   Ek en hy het ‘n week in Johannesburg gekuier, oor Kersfees   het my boetie-hulle vir ons kom kuier   (nie dat ek veel daarvan kan onthou nie, was drie dae in die bed met piep of iets…) en daarna het Renchia-hulle by ons kom kuier.

Ons het gaan visvang – die laaitie het sy vierde vis gevang    en is nie bietjie trots op homself nie en sy nuwe maatjie sy eerste twee  en ons was plaas toe waar hy weer die skape kon aanjaag met sy maatjie se hulp.  

In die tussentyd het die laaitie begin om sy nuwe fiets sonder kantwiele te ry  en ek moes hom leer touspring, want hy moet kan touspring voor hy skool toe gaan – “juffrou het so gesê”!

Gister moes hy maar saam met my kantoor toe kom, want my ma het in die tussentyd begin werk vir ‘n baas – vir die eerste keer in seker 20 jaar nadat sy tuisteskepper en naaldwerkster was. En toe bring hy vir hom ‘n klomp paddavissies huis toe, want die baas het gesê hy kan soveel vat as wat hy wil hê, daar is baie.

En daar was die onderonsie met die spinnekop – weet nie hoekom sy nou juis moes nes maak onder ‘n stoel op ons stoep nie.

O ja en ek en my laaitie was een dag saam met sy ander ouma en sy halfsussie en –boetie en my eks se sussie na sy tannie toe. Hy het dit baie geniet en hy en sy halfsussie het so lekker gespeel. Maar haar ma wil nie hê dat sy by hom moet kom speel nie.

Sondag het ons my eks in Spar raakgeloop en toe sê hy hy is oppad om die vrou by haar tannie te gaan aflaai. En toe ons Maandag by sy huis was om water te gaan haal (‘n deel van die dorp was sonder water en hulle het ‘n boorgat) is die vrou weg, maar haar dogter uit ‘n vorige huwelik en my laaitie se halfsussie en –boetie het agtergebly. Hoe los mens sommer net jou kinders? Ek sal moor voor ek my kind laat gaan.Of het hy haar gedreig soos vir my en sy is te dom om te baklei. Of te bang. Of dalk is sy bly… Want ek het al gevoel ek kan haar wurg as ek sien hoe lelik sy met die kinders is. Vermoed dis hoekom die laaitie nooit vra om na sy pa toe te gaan nie, want hy sien nie kans vir die vrou nie.Blykbaar was sy ook nog bang hy los haar en vat my terug. Moet iets makeer om dit te doen. Hoop net nie hy dink ek gaan hom terugvat en al sy kindertjies onder een dak groot maak nie. Want dan maak hy ‘n reuse fout.

My pa is van mening dat dit vir my kind goed sal wees. Maar ek wil nooit weer in vrees leef nie. Of wonder waar ek kos vir my kind gaan kry nie. Of hoor by watter vrou het hy nou al weer geslaap nie.Want ‘n jakkals verander van hare, maar nie van streke nie.

En as ons bekend was, was hy op die voorblad van die Huisgenoot…