So word ‘n skaap geskeer

Gistermiddag was ons weereens plaas toe. Hierdie keer om te gaan kyk hoe word ‘n skaap geskeer. Ek kan darem nog onthou van toe ons op die plaas gebly het, maar dis iets wat my laaitie nog nooit gesien het nie.

Maar ook dit was nie vir iemand met ‘n klein hartjie bedoel nie! Party van die skeerders is erg onhandig en toe ons daar aankom is hulle reeds besig om ‘n skaap se been toe te werk. Is maar goed dis nie my skape nie, want ek sou almal self moes skeer om sulke goed te probeer verhoed – wonder hoe lank dit my sal neem om 100 skape te skeer…

Dis verbasend hoeveel kleiner ‘n skaap lyk as hy klaar geskeer is. En al wil die boere graag hê dit moet reën, sal hulle verkies dat dit nie gebeur pas na die skape geskeer is nie.

Indien ek dan nou wel skape gehad het en hulle self moes skeer, sou ek net iemand moes kry om die skaapskêre te slyp, want ek sal sowaar al my vingers in die proses verloor!

My laaitie het ook gehelp om die wol te trap en later toe die twee ooie wat se kleintjies ons die vorige dag in die land gekry het geskeer is, het hy die kleintjies in die bakkie opgepas. Mens kan nie glo hoeveel hulle in een dag gegroei het nie. Die enetjie wat alleen afgeneem is, is die outjie wat so ver moes loop huis toe en waar die twee saam afgeneem is, is dit die agterste een van die twee.

Die laaitie kon toe sommer ‘n slag weer kyk hoe koeie gemelk word, my oom se skape word op die buurman se plaas geskeer, want dan deel hulle twee die koste verbonde aan die skeerders. Hulle was net eintlik veronderstel om net gister te skeer, maar het so laat daar aangekom gister dat hulle vandag eers my oom se skape sal skeer, behalwe vir die twee ooie met lammetjies en een wat baie na aan lam is wat hulle gister geskeer het.