Sorex Landgoed, Nala & Rommel

Laas naweek was ek en die laaitie by Renchia vir ‘n show in Centurion. Dit was op die Sorex Landgoed en die plek is asemrowend mooi.

Die show was great, eers was Zac van Niekerk op die verhoog en het hy almal laat skater van die lag.

Daarna was daar ‘n pouse en was dit lekker om met ‘n hele paar bloggers (Jenny, Louise, Sanet, Petro, Lyanda, Nelmarie, Carina, Marie) te kon gesels en veral om weer ‘n slag vir Ralph te kon sien. Die hoogtepunt van die aand was Steve se optrede.

Hy het my weereens verbaas met sy geheue. Die laaste keer dat hy my laaitie gesien het, was die outjie bietjie siek en kon ek nie ‘n foto van hulle neem nie. Hy wou weet waar is my kamera om hulle te kon afneem en toe het ek dit sowaar nie op daardie oomblik by my nie. Ons het gepraat oor Vrydagaand se show en het hy gesê hy sal my nie “drop” nie. Nou hoop ek net om genoeg kaartjies te verkoop sodat ek hom nie “drop” nie!

Nala word nou groot en slaap baie minder as voorheen. Sy speel graag met ‘n tennisbal, maar het ‘n hele paar ander speelgoed waarmee sy haar ook besig hou. Sy wil net nie eintlik vir my kyk as ek haar wil afneem nie!

Gister het die munisipale stakings ook ons dorp laat deurloop. Ek het nie geweet daarvan nie en was baie geskok om te sien hoe lyk die hoofstraat! Teen 16:30 was alles egter weer opgeruim.

As jy wonder hoekom ek so stil is:

Steve Hofmeyr

With Live Band

Datum: 31 Julie 2009

Plek: Wilgerivier Hoërskool Frankfort

Tyd: 19:00

Toegang: R100.00

Snoepie beskikbaar

Vir meer inligting kontak my deur comments!

Saterdag het ons partytjie gehou

Die laaitie wou weer soos laasjaar ‘n Cowboys & Indians koek hê en was dit dus nie weer so gesukkel om alles te kon kry soos laasjaar nie! Donderdagmiddag het hy my gehelp om die koek te bak, maar die keer was daar geen teken van hom toe ek dit moes versier nie.

Hy was darem heel in sy skik met my poging en het opgemerk dat dit darem baie moeite was! Dit maak beslis alles die moeite werd.

Vir die eerste keer waarvan ek weet, het al die maatjies wat genooi was, opgedaag. Hy wou weer ‘n springkasteel hê, maar ek dink dit was sy laaste springkasteelpartytjie. Wat ons volgende jaar gaan doen, weet ek nog nie, maar ek dink hotdogs by die Wimpy klink baie aanloklik!

Die 8 laaities het darem nie een keer baklei nie, maar my laaitie het ‘n paar keer baie opgewonde geraak. Ek het net een keer met hulle gepraat en was daar geen bloed of gebreekte bene nie, so die partytjie was darem seker ‘n sukses!

Nala het baie lekker met die balle wat saam met die springkasteel gekom het gespeel:

En teen die aand was sy moeg partytjie gehou:

My laaitie is 8!

Ek kan nie glo my bruinoogseunskind is sowaar al agt jaar oud nie. Dit raak al moeiliker om geskenke te koop, maar hy was darem heel tevrede met die geweer wat ek vir hom gekies het.

Hy en Nala het vandag saamgekom kantoor toe, maar sy is so soet niemand weet eens hier is ‘n hond nie. Voor ons gery het, het sy eers gou weer in haar basie se bed gaan inkruip:

Iemand het my gekontak nog voor die skole vir die Julie vakansie gesluit het en gevra of ek haar sal help om ‘n handpop vir haar kind se taak te maak. Ek het gesê dis reg, maar glad nie weer van haar gehoor nie. Dinsdag bel sy my weer en vra of sy my Woensdagmiddag kan kom sien. Sy kom toe by my aan met ‘n boek wat vir jou sê wat jy alles nodig het om die handpop te maak, maar wil by my weet wat moet sy kry. Ek sê toe net wat die boek sê en ‘n ruk later kom sy terug met die goed.

Ek begin toe solank om die patrone te teken en merk op dat daar vier ogies is. Dit laat my toe wonder of ek twee handpoppe moet maak. Ek bel haar toe en sy sê ja ek moet twee maak. Ek merk toe dat die materiaal nie genoeg is nie en laat haar weet en sy laat weet toe waar sy dit gekoop het en sê ek moet maar gaan kry.

Ek het toe solank die een handpop gemaak en die tweede se gesig, gistermiddag nog lap gaan kry en die tweede een ook gemaak. Dit moet Maandag skool toe gaan en ek sal haar Saterdagmiddag laat in kennis stel dat ek klaar is!

Visvang in die winter

Die afgelope naweek het Renchia-hulle ons met ‘n kuier verras. Vrydagoggend het ek en sy op Skype sit en gesels toe sy vra of hulle kan kom kuier. Dit was ‘n baie skielike besluit, maar dit was baie lekker om hulle hier te hê, die naweek was net heeltemal te kort!

Ons het Saterdag gaan visvang, behalwe dat die wind soms gewaai het, was dit ‘n lekker sonskyndag en het ons dit baie geniet. Net jammer ons het niks gevang nie!

Nala het ook saamgegaan en het dit baie geniet om in die lang gras rond te hardloop. Dit was die eerste keer dat sy met ‘n leiband geloop het, maar dit het gelyk of sy dit lankal ken.

Baie dankie Renchia, dit was so lekker om julle hier te hê!