Verlede Maandag het iemand navraag gedoen oor ‘n lappop vir Kersfees waarop ek die volgende oggend reageer het. Die persoon het my Donderdag geskakel en gevra vir ‘n lappop soos die een wat ek vir Steve se PA gemaak het en kon ek gelukkig dadelik begin aangesien ek nog van die regte materiaal gehad het.

Ek gaan haar vanmiddag aflewer en vertrou maar sy is goed genoeg…

Verlede Dinsdag het ek Nala laat steriliseer. Dit kos ‘n klomp geld, maar dis beslis beter as om met ongewenste kleintjies te moet sit…

Ek het haar die oggend net voor 08:00 na die dierekliniek geneem en nadat ek haar in die hok gesit het, het sy vir my gekyk asof sy wou vra “Wat dink jy doen jy?” Dit was so hartseer…

Ons het haar net na 16:00 gaan haal en sy het geslaap.

By die huis aangekom, het sy dadelik in haar bed gaan klim.

Sy het eers die volgende oggend na 07:00 opgestaan, maar was toe al heelwat beter.

Haar steke kan eers na twee weke uitgehaal word en jy kan sien dit pla haar, maar verder gaan dit met haar baie goed.

Ek het Maandagmiddag vir haar ‘n wurgketting gaan koop, is nou moeg daarvoor dat so ‘n klein hondjie my rondsleep as ek met haar gaan loop en dit gaan baie beter!

Sondag was ek en die laaitie saam met my liefie, sy broer en skoonsus Vanderbijlpark toe om te gaan Kersinkopies doen. Dit was nogal nie so besig as wat ek gedink het dit sou wees nie en was baie lekker. Ons het by Spur middagete geëet en het almal dit oordoen! Die laaitie was uitgeput en het die volgende oggend eers na 11:00 opgestaan…

Ek het Maandagmiddag uiteindelik sy tand laat regmaak. Hy was baie bang, maar nou kan mens nie eens meer sien dat die tand gebreek was nie. Hopelik sal hy in die vervolg twee keer dink voor hy vir sy ma probeer weghardloop!

Saterdagmiddag was ek en my liefie hier in die dorp by ‘n kuierplek en het die laaitie besluit om by die huis te bly. Sy broer en sy vrou en hul twee kinders by wie hy op die oomblik bly, was ook daar en ons het nogal lekker gekuier. My laaitie het my na 22:00 in trane gebel, wou weet wanneer kom ek dan huis toe!

Ons het hom toe maar gaan haal en het ons verder gekuier tot amper 1:00 die volgende oggend. Dit was lekker, ons het ernstig oor trou gepraat en oor ander goed waaroor ons nog nie gepraat het nie en is ek baie opgewonde daaroor. Om een of ander rede was hy onseker of hy my moes nooi, het nie geweet hoe ek daaroor sal voel dat hy drink nie.

Hoekom hy onseker was, weet ek nie. Dit verander niks tussen ons nie, hy weet duidelik wanneer om op te hou en was nie naastenby dronk nie. En dis nie wat ek van sy skoonsus kan sê nie… Ek oorweeg ernstig om vir haar te sê as hulle weer wil gaan kuier, sal ek eerder na haar kinders by die huis gaan kyk!

Hul kids is baie oulik, die laaitie word einde van die maand drie en die sussie is nou so veertien maande. Hy is nogal erg oor my en kom redelik goed met my laaitie oor die weg.

Skoonsus het net te veel met een van die ouens by die kroeg geflirt en die volgende oomblik moes liefie en ‘n paar mans net keer of daar was ‘n groot gemors! Wat die mense nie weet nie, is dat hy en sy boeties almal geboks het en dat skoonsus se man, die beste een van hulle  was. Ek wil nie eens dink wat kon gebeur het as hulle mekaar moes geslaan het nie. My arme laaitie het daar gestaan met sulke groot oë en na die tyd kon liefie nie genoeg verskoning maak nie.

Waaroor die bohaai gaan, weet ek nie. Dit verander niks aan die feit dat ek hom so lief het dat ek bereid is om my alles vir hom te gee, al kry ek niks in ruil nie…