My noodkreet

Ek is ook ‘n enkel mamma met ‘n ses jarige laaitie. Hy gaan volgende jaar skool toe. Maar al is ek ‘n enkel mamma is ek gelukkig genoeg om ‘n halfdag werk te kon kry. Want ek wil in die middag by my kind wees. Werk ek nou wel in die middag, kry ek dubbel wat ek in die oggend verdien en ek is verplig om een middag ‘n week te werk. En ja, ek mag my kind saamvat. So ek hoef niemand te betaal om na my kind te kyk as ek in die middag werk nie. Hy was ook in die kleuterskool en ek kon elke maand al my verpligtinge teenoor hulle nakom. En dit is nou sonder dat ek by die skool gevra het vir hulp of kwytskelding. En so sal ons ook volgende jaar die skool betaal. Met of sonder pappa se onderhoud. Want die oulike prokureur wat die skikkingsakte opgestel het, het nooit daaraan gedink dat die kind eendag sal skool toe gaan nie. En nee, ek wou net alles agter die rug kry en het ook nie daaraan gedink dat hy eendag sal skool toe gaan nie.

Ek tik ook een maal ‘n maand vir ‘n besigheid in ons dorp hul rekeninge waarvoor ek redelik goed vergoed word. Een middag se werk vir een week se betaling.En pappa betaal wel onderhoud. Nie altyd op datum nie en nie vreeslik baie nie, maar hy betaal en ek gebruik elke sent daarvan net vir my kind.O ja eintlik gebruik ek elke sent vir my kind wat ek nie vir my gebruik nie…En dan is daar ook nog my lappoppe. Waarvoor mense betaal omdat ek baie mooi poppe maak. (jakkals prys sy eie stert… Maar hulle is regtig mooi!)

Maar vra vir hulp sal ek nie maklik nie. Enige skenkings sal egter hoog op prys gestel word….